KUCHING, Mac 6: Sapit Kepala Menteri Tan Sri James Masing melabaka dalam timpuh 10 taun ke deka datai, Sarawak deka bisi tiga batang jalai besai.
Iya ke mega Menteri Pemansang Infrastruktur perengka Pengangkut madah, jalai nya baka Pan Borneo Highway, Jalai Besai Tebing Pantai enggau perambu ngaga indu jalai kedua ti nyambungka Kuching, Samarahan, Sri Aman, Betong enggau Sibu.
Ku iya, nya begunaka ungkus urung RM11 bilion lalu diatu opis menteri iya benung pada dalam proses berunding sentang perambu ngaga indu jalai kedua enggau Kepala Menteri Datuk Patinggi Abang Johari Tun Openg nyengkaum sekretari pekara wang negeri.
“Kami (lebuh ke berandau nya) setuju enggau perambu ngagai indu jalai (kedua) digaga dalam timpuh 10 taun ke deka datai.
“Ungkus nya urung RM11 bilion. Kami dwka ngulihka agih belanja nya, tang ukai ari perintah besai, reti nya projek dipelanja perintah negeri,” ku iya.
Masing ke mega Kaban Kunsil Negeri (ADUN) Baleh madah, perintah negeri merambu nyendiaka peneleba mai entukar ti lqnchar ngagai penguna jalai alun ari Sematan nyentuk ke Miri Highway Tebing Pantai tembu nyengkaum abis kurang lima jematan deka digaga ba timpuh ke sama.
Ku iya indu jalai kedua nya deka ngurangka timpuh pejalai ari Sibu ke Kuching dua setengah jam, enti nguna Pan Borneo nya deka begunaka lima ngagai enam jam.
Pemisi jalai nya ila deka nentuka Sarawak terus ngerembai maju jemah ila. — DayakDaily
