KUCHING, Ogos 7: Penyampau dagang entara Sarawak enggau China sepenyampau RM15.8 bilion taun siti nyin tadi ke alai Sarawak ngerikod eksport sepenyampau RM10.1 bilion, lalu import RM5.7 bilion.
Kepala Menteri Datuk Patinggi Abang Johari Tun Openg madahka kerejasama dagang entara kedua-dua menua mungkur gis asli lela (LNG) enggau produk petroleum, minyak sawit, produk kayu ramu enggau komponen elektrik, barang-barang ke digaga, injin enggau pemakai.
Ku iya beratika menua China landik ba pekara inovasi ke dipeda ulih ngangkatka transformasi ekonomi nengah Ekonomi Digital, Sarawak pechaya ulih belajar ari menua nya ba pekara ngubah ekonomi nengah Ekonomi Digital (DE).
“Tu kelebih agi ba industri mit enggau jelan pemesai, sida begunaka pemanding tauka ngena model dagang ke sebaka ngambika mujur dalam e-dagang. Nengah pemisi chara dalam online, dunya tu makit kitai,” ku iya lebuh ke bejaku ba Forum Sarawak-China ditu kemari.
Ku iya, Sarawak nagit Ekonomi Digital ngenataika penatai pemisi sepenyampau 17.4 peratus ngagai Pemansut Kasar Dalam Menua (KDNK) nyerumba taun 2025, lalu saup Ekonomi Digital ngagai KDNK taun tu dijangka 2.3 peratus. — DayakDaily
