Sarawak beguna mayuh agi jematan dikena nyambung jalai darat

Datuk Julaihi Narawi

BINTULU, Mac 1: Sarawak begunaka mayuh agi jematan ungkup akses jalai darat ke lebih moden sereta manah kelebih agi di menua pesisir negeri.

Nya mega sebagi ari komponen penyukup bungkur jalai tebing pantai ti benung digaga nyadi jalai alternatif ngagai Projek Pan Borneo Highway Sarawak.

Menteri Muda Pemansang Infrastruktur (Jalai Tebing Pantai), Datuk Julaihi Narawi, madahka projek nya ulih mai pemansang, kelebih agi ngagai menua pesisir enggau ulu entigis ke dipansa jalai nya.

Di Bintulu ambika banding, pengawa ngaga Jematan Sebauh deka nyambung pelilih nya enggau Projek Pan Borneo Highway Sarawak, sereta ngenyampatka agi pemansang enggau sosio-ekonomi dia.

“Sebauh ke bela dalam kandang projek Pemansang Koridor Kuasa Tau Dikena Baru Sarawak (SCORE) antara pelilih menua ke benung ngerembai mansang kelebih agi dalam sektor komoditi sawit enggau penyampau ke besai.

“Nya alai, penawa ngaga Jematan Sebauh meraka Sungai Batang Kemena endang ba maya ke patut laban pelilih nya entara pengeluar besai sawit, produk jelu tupi engga pengawa betanam di bagi menua nya ,” ku iya.

Iya bejaku munyi nya pengudah nyadi chairman Sesi Randau Begulai enggau Ketuai Raban Bansa Bekaul Perambu Projek Ngaga Jematan Sebauh, ditu kemari.

Sama bisi datai, Datuk Dr Jerip Susil.

Ku Julaihi, penembu jematan nya ila deka nyadi jematan ketiga digaga meraka Sungai Batang Kemena pengudah Jematan Kuala Tatau enggau Jematan Kemena.

Ku iya, diatu projek jematan nya benung ba renggat netapka injinir perunding ngaga langkar, kelimpah pemun kereja injiniring.

“Jematan Sebauh deka nyadi indu penyambung ngagai semua kandang endur dipelilih nya, nyengkaum rumah panjai, genturung pendiau enggau kebun peranak menua ti deka ngemudahka sida nyual asil komoditi,” ku iya.

Ku iya baru, diatu peranak menua nya nguna perau pulai mansang ke rumah ke ukai aja beguna timpuh lama, tang mega berisiko karam. — DayakDaily