KUCHING, Mac 1: Kaban Parlimen Selangau Datuk Joseph Entulu Belaun madahka perintah komited ngemansang kandang menua sereta ngangkat manah pengidup rayat nuju jalai pengidup ke meruan agi.
“Sukung penuh rayat deka nentuka penegap pemerintah BN ti endang bebendar ke pemaik enggau pengelantang rayat negeri tu,” ku iya.
Iya madah munyi nya pengudah lama udah enda engkeretik bekaul karier politik iya pengudah diberita enda dichalun ba Pengawa Bepilih Besai (PRU14).
Lebuh ditanya sentang karier politik iya, Entulu semina ngilikka pala aja.
Taja pia, Entulu tetap bepesan ngagai rayat ba sitak iya ngambika majak meri sukung ngagai Barisan Nasional (BN) taja pan Presiden Parti Rakyat Sarawak (PRS) Tan Sri Dr James Jemut Masing ngenukuka kerusi Parlimen Selangau deka diari orang baru. — DayakDaily
