Sarawak agi ngembuan mayuh stok pengeraja asal — Awang Tengah

KUCHING, Jan 25: Sarawak agi ngembuan stok minyak enggau gis asal ke chukup dikena nyukung pemansang enggau ekonomi menua.

Sarawak diatu agi megai 29 peratus stok minyak menua.

Sarawak mega agi ngembuan 54 peratus stok gis asal.

Sapit Kepala Menteri ke mega Menteri Industri enggau Pemansang Orang Dagang, Datuk Amar Awang Tengah Ali Hasan ngaku, nengah pemisi pengeraja asal nya menua deka ngasaika pengelantang.

Bejaku ba pengerami bejadi Minggu Tenaga Antarabangsa Ke-4 (IEW) 2018 di Pusat Konvensyen Borneo Kuching (BCCK), Sejingkat, Awang Tengah madahka Sarawak enda tau ngeksport pengeraja asal nya ke agi mata.

Sarawak patut ngerandang industri petrokimia ke bukai dikena nambahka rega pengeraja asal nya.

Ku Awang Tengah, perintah merambu ngeluarka metanol enggau ammonia di Bintulu ti ngembuan penyikap ungkup industri petrokimia.

Ku Awang Tengah, kelimpah minyak enggau gis Sarawak mega ulih ngasilka 20,0000 megawatt kuasa elektrik ari kuasa hidro.

Bisi 14 iti ti ulih endur ngaga tekat hidro.

Kelimpah ngambi pulai Tekat Hidro Bakun, Sarawak mega udah nembuka pengawa ngaga Tekat Hidro Murum nyengkaum deka ngaga Tekat Hidro Baleh. — DayakDaily