Sabah nyambut manah pemutus Kort Federal ba kes S’wak, Petronas

A file photo of Samarang Offshore Complex oil and gas platform, Labuan. — Photo credit: Sangu Nelus

SEPANGGAR, Jun 24: Perintah Sabah nyambut manah pemutus Kort Federal ke nulak pinta Kompeni Petroliam Nasional Bhd (Petronas) deka ngepunka prosiding undang-undang ngagai Perintah Sarawak bekaul hak kompeni minyak menua nya nyaga sereta ngemata aktiviti ngiga sereta ngelumbung minyak enggau gis di negeri nya.

Kepala Menteri Sabah Datuk Seri Mohd Shafie Apdal, madahka sebarang sempekat antara Petronas enggau perintah negeri di Sabah enggau Sarawak enda tau melakangka hak dua negeri nya dalam Konstitusyen Malaysia.

“Konstitusyen nya mengkang enda berubah. Hak Sabah enggau Sarawak ngiga pengeraja asal di negeri sida empu udah ditetap dalam Konstitusyen.

“Enti deka ngubah Konstitusyen, meseti nengah Parlimen dulu,” ku iya madah ngagai pemberita lbuh dikerandau ba Pengerami ‘Rumah Terbuka Aidilfitri’ MP Sepanggar Datuk Mohd Azis Jamman ditu kemari.

Hari Lima tu tadi, Kort Federal udah nulak pinta Petronas nya pengudah Kort Federal enda tau mendingka pekara nya laban relif pekara nya ke dipinta kompeni minyak menua nya ukai ari baruh bidang kuasa Kort Federal, tang Kort Tinggi. — DayakDaily