RTM deka numbuhka panel khas mansik asil seni pengeluar program ari Sabah, Sarawak

Gobind Singh Deo

KOTA KINABALU, Julai 21 – Radio Televisyen Malaysia (RTM) deka numbuhka panel khas beratika perambu pengawa ngeluarka asil kereja pengeluar program di menua tu ke digaga di Sabah enggau Sarawak, ku Menteri Komunikasi enggau Multimedia Malaysia Gobind Singh Deo.

Ku iya madah, panel pemerati tu iya nya ari orang di menua tu empu ke ngembuan pengelandik bekaul bidang nya, kelimpah ngembuan penemu ti mayuh sentang main asal sereta isu di Sabah enggau Sarawak.

“Kitai udah nerima perambu ari pengeluar program kelebih agi ari Sabah enggau Sarawak sentang mayuh orang ti landik kelebih agi raban nembiak ti ngasilka dokumentari tauka filem pandak di nengeri nya.

“Nya alai dikena ngemansut tauka ngangkatka sida nya, kitai patut nyediaka siti platform ungkup sida dikena nyerenih perambu asil dokumentari tauka filem pandak ti enda ibuh nganjung ke Semenanjung… Laban panel pemerati tu diatu semina bisi din,” ku iya.

Iya madah munyi nya ngagao pemberita Program Betemu Enggau Raban Opis Menteri Komunikasi enggau Multimedia Sabah, ditu saritu

Gobind madah panel pemerati tu deka ngaga pemutus sekalika perambu ngaga dokumentari tauka filem pandak nya ke dianjung pengeluar program di menua tu ulih dipansutka tauka end.

“Kitai nerima peminta ngemayuhka program baru sereta dokumentari tauka filem pandak di menua tu di RTM lalu enggau pengawa tu (numbuhka panel pemerati) kitai ulih meri peluang ngagai pengeluar program menua tu mandangka asil sida.

“Tetiap nengeri ngembuan pemanah adat enggau main asal sereta jerita ke bebida, nya alai deka meri peluang ngagai pengeluar program menua tu ngemansutka asil digaga sida, nyengkaum meri bantu agih belanja ari opis menteri,” ku Gobind nandu. — DayakDaily