RM126.6 juta dipelanja ungkup Servis Lutur Terebai di Sarawak

Dr Dzulkefly Ahmad

KUALA LUMPUR, Ogos 8: Sepenyampau RM126.6 juta dipelanja ke servis pengerai mindah kin kitu di Sarawak ngena perengka pengangkut langit ti dikelala enggau Servis Lutur Terebai (PDU) kenyau ari taun 2010 nyentuk 2017.

Ku Menteri Pengerai, Dr Dzulkefly Ahmad madahka servis PDU meri pemaik ngagai 22,113 peranak di menua pesisir Sarawak, ti mar ngelala palan pengerai ke semina ulih dilawa nengah jalai darat enggau sungai.

“Penyampau kumulatif mensia mayuh ari taun 2010 ngagai 2017 ungkup servis tu iya nya 297,604 iku nyengkaum ke baru enggau ke nandu ti nguna ungkus belanja urung RM15.8 juta setaun,” ku iya ba Dewan Rakyat kemari.

Iya nyaut tanya Dr Michael Teo Yu Keng (PH-Miri) ke deka nemu penyampau agih belanja ungkup PDU di Sarawak ari taun 2010 nyentuk 2017 sereta penyampau pesakit ti udah diperubat dalam timpuh nya.

Dr Dzulkefly madahka bisi semilan tim PDU ke sedia meri servis ngagai pesakit luar, nandu perubat penyakit kronik, nyidi penyakit berampit, pengerai indai enggau anak, pelajar pengerai, refer ke kes ngenyit enggau perubat ti nangkanka nya ungkup sekeda kes di sepital. — DayakDaily