Najib didawa nerima RM42 juta ari aktiviti ti enda beradat

Datuk Seri Najib Tun Razak

KUALA LUMPUR, Ogos 8: Ex-Menteri Besai Datuk Seri Najib Tun Razak dibai ke Kort Seksyen ditu, sehari tu atas tiga iti tuduh nerima duit RM42 juta asil ari aktiviti ti enda beradat ke alai duit nya diempu SRC International Sdn Bhd, dalam dua akaun iya, empat taun ke udah.

Taja pia, nadai sebarang akun dirikod ari Najib, 65, pengudah ketiga-tiga tuduh nya dibacha ba mua Akim Azura Alwi.

Ungkup tuduh keterubah nyentuk ketiga, Najib didawa udah nerima duit sepenyampau RM27 juta, RM5 juta enggau RM10 juta asil ari aktiviti enda beradat, nengah Real Time Electronic Transfer of Funds and Securities (“Rentas”) dalam dua akaun AmIslamic Bank Berhad ke diempu iya ti belumur 2112022011880 enggau 2112022011906.

Iya dituduh ngaga semua penyalah nya ba AmIslamic Bank Berhad, Bangunan AmBank Group, No. 55, Jalai Raja Chulan ditu entara 26 Dis 2014 enggau 10 Feb 2015.

Dawa dibantaika nitihka Seksyen 4(1)(b) ‘Akta Pencegahan Pengubahan Wang Haram, Pencegahan Pembiayaan Keganasan enggau Hasil Daripada Aktiviti Haram'(AMLATFPUAA) 2001 ke tau diukum ari baruh Seksyen 4(1) akta ke sama.


Seksyen nya ngungkupka ukum jil maksimum 15 taun sereta ukum mata duit enda kurang ari lima kali lipat penyampau ke diulih ari aktiviti enda beradat, tauka rengka penyalah nya ba maya penyalah nya dikereja tauka RM5 juta tauka barang bagi ke tinggi agi, enti amat ditemu salah.

Kena 4 Julai tu tadi, Najib ngaku enda salah ba Kort Tinggi ditu atas tiga bansa tuduh makai duit (CBT) enggau siti tuduh salah nguna kuasa ke bekaul enggau duit turu RM42 juta ti diempu SRC International Sdn Bhd.

Najib diari akim Tan Sri Muhammad Shafee Abdullah lalu penawa betuaika Akim Menua, Tommy Thomas. — DayakDaily