Palan Internet 1Malaysia deka dikemanah, servis telekomunikasi di S’wak benung diangkatmanah

Digital devices and data. — DayakDaily.com file pic. // Photo: Pixabay

KUALA LUMPUR, Ogos 8: Opis Menteri Komunikasi enggau Multimedia benung beratika chara dikena ngangkatmanah palan internet ti ditumbuhka perintah di serata menua ke udah repuk sereta enda ulih dikena agi.

Menteri opis nya Gobind Singh Deo madah ngambika juluk nambah penyampau penguna Internet ke lalu ngadaka raban bansa ti bepelasarka penemu ulih dimaksimumka.

“Aku bisi nerima sebana ti madahka bisi palan ditutup lalu dalam timpuh dua bulan ke sebedau tu aku udah minta ngambika penanggul tu diperati baru ngambika program nya ulih meri pemaik ngagai mensia mayuh,” ku iya ba aum Dewan Rakyat kemari.

Iya nyaut tanya tambah Su Keong Siong (DAP-Kampar) ti madahka mayuh Internet 1Malaysia enda chukup dikemanah lalu nya bisi ditutup.

Dulu ari nya, Gobind madahka nyentuk ke diatu bisi 860 iti palan Internet nya tembu digaga sereta beoperasi di serata menua.

Gobind mega madahka perintah benung chakah majakka projek ‘Internet Kandang Luar Ari Pasar enggau Internet Menua Pesisir ari baruh inisiatif ngerembaika bungkur Internet tetap, ti nyendiaka infrastruktur Internet enggau peneras nyentuk 20 Megabits sesikin (Mbps) ba kandang luar besemak enggau pasar enggau menua pesisir.

Nyentuk ke diatu ku iya, bisi 9,552 sambung udah disedia di Sarawak, lalu 16,056 sambung mengkang ba renggat digaga.

“ Inisiatif ngemesaika bungkur selular enggau Internet mudah alih mega dipejalaika mungkur nirika tiang telekomunikasi baru sereta ngangkatmanah tiang ke udah bisi,” ku iya.

Iya nyaut tanya Datuk Aaron Ago Anak Dagang (PRS-Kanowit) ti deka nemu sekalika perintah Pakatan Harapan agi ngamatka polisi enggau pelin pemansang ungkup servis telekomunikasi Sarawak seriris enggau polisi sereta juluk perintah negeri ti ngemansangka program digital ekonomi.

Gobind madah, diatu bisi 412 tiang telekomunikasi baru tembu digaga sereta diaktifka, lalu 57 iti tiang benung didirika di Sarawak.

Kelimpah ari nya, bisi 1,058 tiang ke udah bisi diatu udah diangkatmanah bungkur servis nyentuk ngagai 4G, lalu 131 tiang ke diatu benung ba renggat ngangkatka manah di negeri nya.

“Nengah pengawa nirika tiang baru sereta ngangkatmanah tiang ke mungkur servis 3G enggau 4G, rayat deka ngasaika servis Internet ke deras sereta tegap agi nyentuk ke 100 Mbps,” ku iya. — DayakDaily