Rh Daniel, Menyalin Baru di Debak diteritkan PKP

Pengawa beperesa ikas pengerai dipejalai di Rh Daniel, Menyalin Baru.

KUCHING, 15 Mac: Rumah panjai Menyalin Baru di Debak ke diwan 61 iku orang ari 20 ruang bilik diteritkan Perintah Tagang Pemindah (PKP) berengkah Hari Lima tu tadi.

PKP nyentuk ngagai 25 Mac 2021 nya meri awak ngagai raban terabai menua bejalaika peresa pengerai sereta kereja sanitasi.

Kelimpah ari nya, Opis Pengintu Pengelantang Pendiau Betong bisi datai nganjung bekal pemakai ngagai sida sekayu rumah.

Sentang kaul nya, Tuai Rumah Daniel Ranti ti ngarika peranak Menyalin Baru ngelalau anakbiak iya meri kerejasama ngagai ijinsi perintah ti ngintu atur kuarantin sida.

Tr Daniel minta semua peranak ngambi peresa pengerai ngambi mantu ngemudah pengawa raban terabai menua ari Opis Pengerai Malaysia nentuka ikas pengerai sida.


“Anang lari maya pengawa peresa pengerai dipejalai. Perundingka pengelikun bala ruang bilik enggau orang ti semak enggau kitai.

“Beri kerejasama ngagai raban terabai menua ngambika kitai sama bela nagang pengelekai igi penyakit Covid-19,”ku iya. — DayakDaily