‘Rentap ukai lanun’, ku Asadia

Mabong Unggang
IBRACO WEBSITEI

Oleh Chris Bishop

KUCHING, 23 Julai: Ketuai Akademi Serakup Dayak Iban Sarawak (Asadia), Mabong Unggang, ngelalau semua kelebih agi raban pengarang berita enggau bup ke ngarang cherita Libau Rentap badu meri gelar iya lanun.

Ku iya, Rentap ke nyadi ketuai perang Batang Skrang siku bujang berani ti taluk ke menua sereta enda rinduka kuasa ti deka megai menua ba jeman nya.

“Anang ngumbai orang ke bebunuh seput ketegal ti ngetan ke menua nya lanun. Penemu nya salah alai aku sigi enda setuju,” ku iya bejaku ngagai DayakDaily.

Tambah Mabong, orang baka Rentap enggau Linggir Mali Lebu sereta bujang berani ke bukai enda patut diberi gelar lanun ketegal raban bujang berani tu meh ti udah ngelaban perintah Rajah Brooke kelia.

Gambar ilustrasyen Rentap enggau bedil ‘Bujang Timpang Berang’.

“Chara seduai (Rentap enggau Linggir) ngenan ke menua ari ti dirumpak bansa bukai ukai enggau chara belalai tauka ngipa sengapa lalu nyerang belalai maya orang enda ngadang.

“Tang seduai dipeda angkat ngelaban lalu madahka pengeringat diri,” ku iya.

Nitihka penerang Mabong, sejarah nusuika James Brooke meri basa ngagai Rentap ari leka jaku iya ti ngumbai Rentap nya “Rajah Ulu”.

Ba maya Rentap nyurut kediri ngagai Ulu Julau ku Mabong, James Brooke bisi ngasuh siku Melayu ke benama Abang Aing nampungka pesan ngagai Rentap diak iya (Rajah) deka betemu sereta bebaik enggau Rentap.

Tang Rentap tegap penemu, sigi enggai betemu enggau orang ti keran deka ngerumpak menua.

Berindik enggau nya Mabong minta sejarah dipeda ari segi pemerani enggau pengeransing ati bala bujang berani ngenan ke menua ari ti dipegai sereta dikeruga bansa bukai ari menua sebali hari.

“Pengarang orang putih sigi enda nanahka orang empu menua ti udah berambunka nyawa ngenan menua diri. Tu ketegal sida (bansa luar) maya nya sepeneka ati ngerampas pengeraja menua Sarawak,” tandu iya.

Ketegal nya mega ku Mabong, bansa luar ngena chara psikologi meri gelar bala bujang berani kitai orang jai tauka lanun ngambika bansa iya empu pan enda rinduka sida.

Anang ngemaruh sereta bejai bujang berani ti berambun ke seput ngenan ke menua, ku Mabong.

Rentap berengkah nyadi munsuh Rajah James Brooke pengudah kubu iya (Rentap) di Kerangan Peris diserang soldadu Rajah.

Bepun ari nya, konflik Rentap enggau Perintah Brooke majak nyadi alai Rajah Brooke nuduh Rentap lanun.

Ba piak Rentap, penatai Rajah Brooke nya ketegal ti deka megai kuasa lalu ngerampas pengeraja menua. — DayakDaily