Rapelson: PBDSB ukai munsuh politik PKR tang BN

KUCHING, Okt 25: Parti Bansa Dayak Sarawak Baru (PBDSB), madahka raban ketuai PKR Sarawak ngembuan ulah ti bingking sereta ngelubaka diri ba atur sereta ngereja pengawa politik di Sarawak.

Jaku timbal ari Ketuai Raban Nembiak tu beduduk ari ulah Simon Siah ke mega siku ari raban nembiak PKR ti madahka PBDSB enda ngereja pengawa ke Bansa Dayak enggau menua Sarawak lalu semina nemu bejaku aja. Simon Siah ba penerang iya mega madahka luyar PKR seruran nurun niki kort becharaka kes tanah NCR.

“Simon Siah tu siku luyar. Luyar ukai ngari ka PKR tang nurun niki Kort ketegal udah pengawa luyar. Tu mandangka Siah enggau PKR ngakun diri bepolitikka institusi pengawa luyar dikena ngelakuka parti sida?” ku tanya Rapelson Richard Hamit.

Rapelson mega madahka ulah tu balat tinggi jaku sereta enggau tuju ngemaruh ka parti penyakal menua Sarawak tu empu. Iya manding luyar NCR bukai baka Dato Seri Daniel Tajem (PBDS), Paul Raja (DAP), Dominique Ng (ex-ADUN PKR Padungan) enda kala ngakun sereta ngelakuka diri nengah parti.

“BN tu ti dilaban kitai. Aku alit ati ke ulah PKR balat ngelanyah sereta mejah PBDS Baru. Nama sida enda nganu STAR, PBK, SWP enggau parti asal ke bukai?”, tanya Rapelson.

Iya mega nerang, MDC/SNAP suba kala ngaga kerejasama enggau PKR ba taun 2006 maya Bepilih Kunsil Nengeri, tang mayuh chalun alah ketegal nadai bantu ari Ketuai PKR Malaya baka Datuk Seri Anwar Ibrahim enggau Dato’ Seri Mohamed Azmin Ali.

Berindik ari nya, Rapelson madahka bansa Dayak ti nyeretai PKR semina dikena nambahka pemayuh tubuh sereta pengering ke parti nya tang ukai meri empas ke bansa Dayak empu.

“Baru Bian enggau Nicholas Bawin nemu pekara tu. Nya alai Mengga (Mikui, chalun PBDS P214 Selangau) nyurutka diri ari PKR,” ku Rapelson.

Beduduk ari nya ku Rapelson, kini ke tuju Dayak enti sema kuing perau PKR enda betul, laban bansa Cina dalam PKR ulih merejuk ngagai DAP, lalu Melayu PKR bisi AMANAH / PAS alai bepanggai.

“Sekali ka Dayak PKR merejuk ngagai BN tauka numbuh parti baru ti ngasuh Dayak pambar?” ku Rapelson.

Rapelson mega madah, PKR nguna sesebengkah NGO Dayak dikena bejalaika pengawa politik sida lalu nguna NGO dikena nyapai juluk ati politik. PKR patut meri terima kasih ngagai NGO. — DayakDaily