Chara baru deka dikena nyukat tanah NCR

Datuk Amar Awang Tengah Ali Hasan

SERIAN, Okt 26: Opis Tanah enggau Survei deka nguna chara baru dikena ngenyampatka pengawa nyukat Tanah Adat Bansa Asal (NCR) kelebih agi lot individu.

Sapit Kepala Menteri, Datuk Amar Awang Tengah Ali Hasan madahka iya udah ngarah ngiga chara baru lalu ngarap ulih ngangkatka produktiviti bekaul pekara nya.

“Aku udah ngarahka Opis Tanah enggau Survei ngiga chara baru dikena ngenyampatka pengawa nyukat tanah NCR kelebih agi lot individu.

“Chara nya ulih dikena nyukat lot individu seraya ngangkatka produktivi opis nya,” ku Awang Tengah madah ngagai pemberita kemari.

Dulu ari tu, iya ke mega Menteri Pemansang Kandang Nengeri udah nyuaka surat Tanah Galau Komunal Bumiputera ari baruh seksyen 6 enggau pala tanah ari baruh seksyen 18 Kod Tanah Sarawak.


Ba pengerami nya bisi 20 buah genturung pendiau ari Pelilih Menua nya nerima surat tanah galau Komunal Bumiputera lalu 141 iku ari Kpg Riih, Serian nerima surat pala tanah ke diatur ba Balai Ranchan, ditu kemari.

Lebuh ke bejaku ba pengerami nya, Awang Tengah madahka perintah deka majak nyukat ngelingi enggau lot individu.

Ku iya, 53 kandang menua ke mungkur 16,256 hektar udah disukat ari baruh seksyen 18 Kod Tanah Sarawak nengah inisiatif NCR ti berengkah dipejalaika dalam taun 2010.

31 kandang menua ke mungkur 4,478 hektar enggau 5,487 lot udah dikeluarka pala tanah sereta disua ngagai pengempu.

Ungkup genturung pendiau tradisional, 358 buah genturung pendiau udah disukat ba timpuh ke sama ti mungkur 52, 863 buah rumah.

Sama bisi datai kemari ADUN Kedup Martin Ben, Pengarah Opis Tanah enggau Survie Zaidi Mahdi enggau Supritendant Opis Tanah enggau Survei Serian Jacqueline George Paau. — DayakDaily

Share this article!