‘Rang Undang-Undang Referendum ungkup Sabah, S’wak patut dipejuraika di Parlimen’

Signature. — DayakDaily.com file pic. // Photo: Pixabay

KUCHING, Ogos 19: Dewan Rakyat tau bejuraika Rang Undang-undang Referendum sereta ngemendarka nya nyadi Akta Referendum dari baruh Pekara 161E Konstitusyen Perintah Besai dikena nyaga rintai hak ke semina ungkup Sabah enggau Sarawak.

Ku Chairman Sarawak Cultural Research Society Datuk David Teng madah, ari nya Sarawak ulih nyadaka hak nengah referendum.

Iya bejaku munyi nya ba forum ke diatur Parti Rakyat Bersatu Sarawak (SUPP) pampang Batu Lintang kena malam Hari Lima tu tadi.

Pekara 161E Konstitusyen Perintah Besai madahka ‘Perlindungan kedudukan perlembagaan Sabah dan Sarawak’ bisi beberapa subseksyen.

Teng, ke mega ex-Kaban Kunsil Negeri Repok madahka Rang Undang-undang Referendum meseti dipejuraika Kaban Parlimen ari Sarawak tauka Sabah.

Ku iya, ngambika rang undang-undang nya nyadi akta, ambis nadai begunaka 140 undi nyukung ari 222 Kaban Parlimen ke diatu.

Nengah nya ku Teng, Sarawak enggau Sabah mengkang begunaka mayuh sukung Kaban Parlimen ari Semenanjung.

Tambah iya, sekalika perintah besai ari baruh Pakatan Harapan ulih mulaika hak ari baruh Sempekat Malaysia 1963, nya deka nentu bakani bala pengundi di Sarawak ngundi ba pengawa bepilih ke deka datai.

Pengawa Bepilih Kunsil Negeri ke-12 dijangka diatur salam taun 2021.

Teng pechaya isu bekaul hak enggau autonomi Sarawak deka nyadi entara isu ke deka ditegika Gabungan Parti Sarawak enggau Pakatan Harapan nyerumba pengawa bepilih nya. — DayakDaily