Raban Nembiak PBDSB besemaya meri sukung penuh ngagai ketuai tetinggi parti

Julius Enchana

KUCHING, April 15: Raban Nembiak Parti Bansa Dayak Sarawak Baru (PBDS Baru) meri sukung penuh ngagai ketuai tetinggi parti nentuka bagi chalun ungkup pengawa bepilih besai ke-14 (PRU14).

Sekretari parti Julius Enchana madah, taja pia integriti, kredibiliti enggau akauntabiliti patut nyadi kriteria nentuka bagi chalun lalu ukai semina populariti, seraya madahka raban Nembiak PBDS Baru deka meri sukung ngagai chalun parti.

“Kami majakka singkang nengah Agenda Dayak lalu Kunsil Besai deka nerima sukung penuh ari raban nembiak. Kitai meseti berakup ngambi pulai kerusi ke diempu PBDS suba,” ku Julius.

Seraya madahka PBDS Baru nya sebuah parti ke liberal, ti berat agi ke komuniti ari peneka sesiku.

Empai lama udah, direktor pengawa bepilih PBDS Baru Rapelson Richard Hamit madahka sida diatu datai ba renggat ke penudi endar nyerenih chalun parti.

Nyadi swbuah parti penyakal ari negeri tu, kitai nadai kaul enggau parti ari Semenanjung Malaysia, seraya minta komuniti Dayak enggau ke bukai nyukung PBDS Baru.

“PBDS Baru sebuah parti ti ngembuan kuasa penuh. Kitai enda ibuh nganti ‘bos’ ari menua seberai (Semenanjung Malaysia) meri pemendar lalu tu nyata dipeda maya PRN sebedau tu ke alai semua chalun nya dipilih parti empu,” ku iya.

Lebuh ditanya sekalika iya deka bediri minta pilih ba PRU14, iya enggai nyaut seraya mantaika langgur penemu madahka anang mantah sesapa ke dichalun ila.

Julius siku ari chalun ti dikeandalka PBDS Baru ungkup sitak Lanang. Kelimpah ari nyadi kaban PBDS Baru, iya mega chairman Gerempung Dayak Dudong. — DayakDaily