KUCHING, Mac 11: Rebak baru di Sarawak meseti krearif berunding ngambika negeri tu nyadi entara negeri ke pemadu maju, beteknologi tinggi sereta bepenatai pemisi tinggi nyerumba taun 2030, ku Kepala Menteri Datuk Patinggi Abang Johari Tun Openg.
Ku iya, sesiku orang ti ngembuan kreativiti ulih ngaga ubah lalu nembiak rebak baru patut nyikap diri ngena teknologi baru, enti enda sida deka tinggal.
“Maya kita dekaka sesiti utai, nya deka nyadi insentif ke kita ngaga jalai enggau chara nyapai pengingin nya.
“Runding ke destruktif ke mai kita nyadi lebih kreatif, reti nya nyadi normal tauka ukai pekara ke nyelai ngujungka kita ngiga chara baru pansut ari pekara nya. Nya kebuah aku beratka pekara digital dikena ngubah chara orang kereja enggau idup,” ku iya.
Iya bejaku munyi nya lebuh bejadi Pameran Kerjaya Dan Latihan Sarawak (Pameran SCaT 2018) ba Pusat Konvensyen Borneo Kuching (BCCK) kemari.
Sama bisi datai Menteri Dagang Entarabansa enggau E-Dagang negeri Datuk Seri Wong Soon Koh enggau Menteri Muda Perambu Mengeri, Ngatur Tanah enggau Rampa Menua, Datuk Len Talif Salleh.
“Aku ngarapka ba pemandang SCaT ke sekali tu, raban biak sedia nguna chara baru ekosistem bekereja,” ku Abang Johari.
Pemandang SCaT 2018 dipasuk 153 istitusi, tlalu nyadi peandang ke pemadu besai taun tu di Sarawak ke udah diatur kenyau ari taun 2012, enggau juluk meri peluang pelajar, latih enggau kereja ngagai siswazah enggau nembiak ke udah badu sekula. — DayakDaily
