SIBU, Mac 11: Opis Menteri Pelajar bebendar deka mantu mutarka penanggul sekula repuk di Bagi Menua Kapit.
Pekara tu dipadah menteri opis nya Datuk Seri Mahdzir Khalid ba pengerami makai lemai enggau bala pengajar ba Balai Sri Baleh, Kapit diu empai lama.
Ku iya, opis menteri pelajar serius beratika tetiap penanggul ti ditapi sekula ke alai sida deka ngangkatmanah kualiti pelajar dikena ngedut seraka pelajar entara sekula menua pesisir enggai di mengeri.
“Opis menteri aku serius berarika lima batang pekara dikena mantu sekula repuk di Kapit. Lima pekara tu iya nya ngerembaika bungkur internet, bekal ai beresi, ngaga buding, kuasa generator enggau sistem solar,” ku iya.
Samabisi ngulu pengerami nya Sapit Kepala Menteri Tan Sri Datuk Amar Dr James Masing, Sapit Menteri Pemansang Menua Pesisir enggau Kandang Menua Datuk Alexander Nanta Linggi, MP Hulu Rajang Datuk Wilson Ugak, ADUN Pelagus Wilson Nyabong, ADUN Bukit Goram Jefferson Jamit, ADUN Murum Kennedy Chukpai, Sapit Direktor Besai opis menteri nya Datuk Sulaiman Wak, Direktor opis pelajar negeri Rakayah Madon enggau Residen Kapit Joseph Belayong.
Ku Mahdzir, belanja besai deka diguna ngaga projek ba sekula ke repuk nya.
“Aku deka maj pekara tu ngambika diperati bala ba opis menteri aku lalu aku deka minta mayuh agi belanja dudi ila,” ku iya.
Sebedau nya, Mahdzir bisi nemuai ngagai SMK Balleh enggau SK Lepong Baleh.
Lebuh ke nemuai nya, iya beratika kededua buah sekula nya udu amat udah repuk lalu patt digaga enggau jampat.
“Penanggul besai ba SMK Baleh iya nya buding. Kitai dekaka opis menteri pelajar negeri ngulurka bantu. Kami udah beratika penanggul ba sekula nya,” ku iya.
Nengah awak nya, Mahdzir madahka iya udah ngemendarka pengawa ngaga opis pelajar ke baru di Kapit.
“Aku nemu taba nya udah dikelala lalu aku deka beratika peminta nya enggau unit ke bekaul dalam opis menteri ngambika dikemendar.” — DayakDaily
