KUCHING, Jun 25: Dayak Bikers Kuching Chapter (DBKC) mujur ngatur sebengkah kimpin dikena ngumpul pemeri bantu ari mensia mayuh ngagai peranak Rh Annie William, Kampung Semawa Ulu, Pantu ke ditinggang penusah angus, bulan siti tu tadi.
Penerang ari Ketuai Projek Kimpin, Mathew Abu madah sida bisi bejalaika pengawa nerima pemeri ari mensia mayuh sepengelama 6 ari bepalan ba Kuching Sentral.
Pemeri ke diterima ba kimpin ti berengkah 15 nyentuk ngagai 20 Jun nya baka ke gari lama sereta produk pemakai.
Pengawa di Kuching Sentral nya dipenyadi Menteri Muda Nembiak enggau Lumba ti mega Kaban Kunsil Nengeri (Adun) Balai Ringin Datuk Snowdan Lawan.
“Kami enda nyangka kimpin tu nerima sukung sereta timbal ti manah ari mensia mayuh.
“Meri besai terima kasih ngagai raban penguasa Kuching Sentral ke udah nyendia palan endur kami ngemujurka kimpin tu.
“Kami mega bisi ngambi gari-gari tu ari rumah mensia mayuh ke bisi telefon ngagai bala Dayak Bikers. Jaku gerah senentang kimpin tu dikenataika kami ngena radio, suratberita enggau media rama,” ku Mathew.
Kena ujung minggu tu tadi, raban DBKC bisi ngatur konvoi motosikal ke Pantu dipasuk urung 25 iku raban endur sida nganjung pemeri nya ke diterima TR Annie.
Semua pemeri bantu ku Mathew dibai nguna trak soldadu ari 1st Division Kem Muara Tuang.
Kimpin nya mega dibantu raban Dayak Bikers ari Sibu, Bintulu enggau Miri. — DayakDaily
