ENGKILILI, Feb 26: Raban bansa Cina meseti beserakup nyukung Kepala Menteri Datuk Patinggi Abang Johari Tun Openg enggau Barisan Nasional (BN) ke penegap politik belama, pia ku Kaban Kunsil Negeri (ADUN) Engkilili Dr Johnical Rayong Ngipa.
Ku iya, bansa Cina enda tau ngenyauhka diri belama sereta naruh dendam laban nya tau ngelemika sada sida nuntut hak ari perintah.
“Nya kebuah, sebarang sentimen ti diuji dibantai ba media sosial tauka berita ti dikenatika nengah randau patut diperatika silik dulu laban kitai enggai majakka diri terus dikemelika orang bukai,” ku iya.
Rayong madah, raban bansa Cina kelebih agi di DUN Engkilili taja pan bansa minoriti tang semua utai ke diguna enggau namun hak sida nadai kala enda dikeibuhka baka bansa Iban enggau Melayu.
“Aku pengari rayat ngagai semua bansa di DUN itj lalau semua peminta kita kelebih agi ba pengawa ngungkupka pemansang enggau geran MRP sigi dikeibuhka, enti mimit sama mimit asal semua sama.ngasai laban nya hak kita ke nyadi pengundi enggau peranak Engkilili.
Iya mega ngarapka raban bansa Cina besaup enggau perintah nengah pengulih enggau runding lalu muai runding nyadi anak iru laban kitai semua peranak Sarawak sereta rayat Malaysia.
Rayong mega ngelalau, sentimen negatif ti dimain penyakal semina ke tuju nginti undi sida aja. — DayakDaily
