Perintah BN deka naka ulih ngemansangka Sarawak

Datuk Patinggi Abang Johari Tun Openg

BINTULU, Feb 26: Perintah negeri deka naka ulih ngiga chara ke pemadu manah dikena ngemansangka Sarawak, pia ku Kepala Menteri Datuk Patinggi Abang Johari Tun Openg.

Nya kelebih agi fokus ngagai nguna perengkaguna bepelasarka teknologi setipak enggau pemansang revolusi Industri 4.0.

“Aku enggau bala bukai dalam Barisan Nasional (BN) deka ngiga chara baru ba gaya ke inklusif sereta kemerah ba dagang ti ulih mantu mempa gaya ti kondusif ngagai orang di luar kelebih agi kompeni menua tu beranakka puku baru ngaga loji di Sarawak,” ku iya.

Iya mega pechaya pengidup bala rebak baru jemah ila deka manah agi, ti diiri enggau penemu teknikal sereta pemandai ngambika sama nyingkang mansang.

Ku iya, ke beguna amat kaul pemereti ati enggau penegap di negeri tu patut diintu belama laban nya nyaup kitai mansang ke mua.

“Kita betuah laban BN Sarawak majak kering sereta ngembuan pemereti ati ke manah ba bala ketuai komponen.

“Nya kebuah aku pechaya pengidup kitai deka meruan agi jemah ila ,” ku iya.

Abang Jo mega madahka diri gaga ati meda negeri enggau politik negeri tu tegap ti ulih nuju pemansang asil ari pelasar ke TYT Tun Pehin Sri Abdul Taib Mahmud ba komponen parti BN Sarawak maya iya nyadi kepala menteri.

“Nya alai, aku ke nyadi kepala BN Negeri ke baru deka ngemajakka pengarap nya nyadi pelasar kitai gawa begulai dikena ngemansangka Sarawak nitihka landskap ekonomi baru,” ku Abang Johari. — DayakDaily