KUCHING, Jun 21: Menteri Muda Jalai Tebing Pantai Sarawak Datuk Julaihi Narawi ngarapka perambu projek ngaga tiga jematan ke dibelanja perintah besai ari baruh projek jalai tebing negeri tu ulih diteruska ungkup guna peranak di kandang menua pesisir Sarawak.
Pengawa bejalaika projek nya ku iya, enda patut dikaul enggau politik, tang dikena ngempitka seraka pemansang kandang mengeri enggau kandang menua pesisir di negeri tu.
“Tiga jematan tu iya nya Jematan Rambungan, Igan enggau Batang Lupar.
“Ketetiga jematan tu agi nganti pemendar ari perintah besai laban projek tu mega begunaka agih belanja ari sida.
“Jematan Igan enggau Rambungan ngena agih belanja penuh ari perintah besai, tang Jematan Batang Lupar iya nya kerejasama perintah besai enggau perintah negeri.”
Pengawa ngaga tiga jematan ku Julaihi, endang patut dikena nentuka pengelanchar projek jalai tebing pantai di Sarawak.
“Kitai ngarap sereta besampi ngambika perintah baru (Pakatan Harapan) ulih ngemendarka projek tu baka ke udah diperambu,” ku iya.
Dua jematan bukai ke mega sama bisi dirintai; Batang Samarahan enggau Batang Sadong udah tembu digaga.
Julaihi bejaku munyi tu lebuhka dikerandau maya Pengerami Nyambut Pengabang Aidilfitri ba rumah iya ditu, malam kemari.
Entara ke bisi datai iya nya Kepala Menteri Datuk Patinggi Abang Johari Tun Openg.
Beserimbai enggau nya ku iya, sekeda projek ngaga jematan ke ngena pakej ti begunaka agih belanja ari perintah negeri endang tetap diteruska baka ke udah dipelin.
“Tu nyengkaum Jematan Krian, Saribas Muara Lassa, Kuala Paloh enggau Batang Rajang.
Julaihi mega bisi madahka pematut ngaga Jematan Batang Lupar ke deka meri pemaik ngagai bepuluh ribu peranak di kandang menua nya.
“Tu (Batang Lupar) patut digaga laban senentang enggau jalai pesisir ti deka nyambung kandang menua pesisir enggau kandang mengeri.
“Diatu penanggul perengka pengangkut ti besekut suah nyadi di kandang menua tu, kelebih agi ba palan penyangkai feri, ke ngujungka sida ti bekenaka jalai tu napi penanggul.
Pia mega, bisi ke nyau nganti lebih ari tiga jam laban deka meraka sungai tu ti ngena semina 45 minit aja. — DayakDaily
