TATAU: Projek ngaga jematan Sungai Anap ke manjai 100 meter ti beungkus RM3.2 juta deka meri pemaik ngagai semua peranak di 49 rumah panjai ngelingi nya disadang tembu dalam bulan Jun 2018.
Projek berengkah 2 Ogos tu tadi deka dikena nyilih jematan kompeni kayu batang ti dikena peranak menua nya ngelama tu ke nyau deka runtuh.
Bjaku ba aum media udah bekau bejadi pengerami Nasih Tanah Projek Ngaga Jematan Sungai Anap, Tatau, Menteri Ba Opis Menteri Besai Datuk Joseph Entulu Belaun ngakun iya mai Ketuai Pengarah Unit Penyelarasan Perlaksanaan (ICU) datai kia lebuh ke minta belanja ungkup projek nya sebedau tu.
Entulu ke mega Kaban Parlimen Selangau madahka projek nya laun digaga laban begunaka pansik silik sebedau digaga.
Entulu nganggap pengawa ngaga jematan nya besai amat reti sereta guna ngagai peranak di Ulu Anap nyengkaum sekeda ba kandang menua Kakus.
