PRN12: Raban ketuai komuniti DUN Ngemah meri sukung ke tegap ngagai Alexander

Raban ketuai komuniti begelumu di Sibu endur sida mandangka sukung ngagai Alexander, andalka iya ulih menang nengah majoriti besai ba pengawa bepilih ti deka datai.

The English version of this story can be found here.

KUCHING, 28 Julai: Enam pengulu, tujuh kaunselor sereta 27 iku tuai rumah besemaya nyukung ADUN Ngemah, Alexander Vincent ngenanka sitak kunsil nya ba Pengawa Bepilih Negeri Ke-12 (PRN12) ti deka datai.

Nitihka penerang Pengulu Barnabas Angkis, raban ketuai komuniti udah mandangka sukung ngagai Alexander alai iya sigi ditemu ulih bejalaika tanggungpengawa enggau manah.

“Kitai deka ngenataika pengarap diak YB Alexander Vincent chalun ke pemadu engkeman ti tau nguluka kitai ba pengawa bepilih negeri ti deka datai.

“Iya (Alexander) udah mayuh mantu kitai ngelamatu alai kitai ngarapka iya ulih nampung pengawa manah ungkup timpuh lima taun agi,” ku Barnabas ba sebengkah pengawa gelumu ke diatur di siti restoran di Sibu malam tadi.

Kelimpah ari Barnabas, lima iku pengulu bukai iya nya Pengulu Juni Masam, Pengulu Ugap Seribu, Pengulu Leong, Pengulu Bennett Juntan enggau Pengulu Ron Ugai bisi mega bejaku seraya ngenataika sukung ungkup Alexander malam nya.

Tujuh iku kaunselor sereta 27 iku tuai rumah bela besemaya meri sukung ngagai Alexander.

“Alexander sigi angkun bejalaika pengawa sereta chukup mentas begulai enggau rayat. Ketegal nya kami dekaka iya nampung pengawa manah nya,’ku sida nengah siti penerang ngagai pemberita.

Bala ketuai komuniti tu mega meri sukung ke tegap ngagai Alexander ngambi sekali agi nyadi chalun ba Ngemah ari Parti Rakyat Sarawak (PRS) ke nyadi sebengkah parti dalam gempung Gabungan Parti Sarawak (GPS).

Ba pengawa bepilih taun 2016, Alexander menang nengah majoriti mit 154 undi alai iya ngalahka 3 chalun bukai. Iya bulih 2,888 undi.

Lebuh dirandau, Alexander ke mega Kaban Kunsil Besai PRS madah ke diri chukup pechaya bulih mayuh agi undi serak tu bepelasarka sukung ke diberi raban ketuai komuniti ngagai iya.

“Ba sentang tanggungpengawa, aku dekaka mayuh agi projek infrastruktur digaga ditu kelebih agi projek jalai, bekal lektrik enggau bekal ai ungkup semua 300 rumah panjai ba kawasan.

“Juluk tu ulih dijapai ketegal Ngemah dalam kandang endur Ijinsi Pemansang Ulu Rejang (URDA) ti udah diberi agih belanja penyampau RM1.5 bilion dikena ngaga mayuh bengkah projek enggau tuju ngangkat pengidup peranak di Ulu Rejang,” ku iya.

Diatu, nyauka 80 persin genturung pendiau di Ngemah udah datai jalai alai Alexander pechaya deka manggai 100 persin dalam timpuh lima taun ti deka datai lalu URDA deka ngubah gaya pengidup rayat.

Ngenang kaul bukai, iya madah Jalai Ng Ngungun nuju Jagau pemanjai 22 km deka digaga URDA dalam 2 fasa.

Tembu ila ku iya, jalai nya deka meri pengelantang ngagai 30 buah rumah panjai di Jagau ke nyadi siti genturung pengentap pendiau di Ulu Ngemah.

“Baka Jalai Ng Ngungun nuju Temalat, jalai nya deka tembu digaga enda lama agi,” ku iya.

Tembu ila, jalai pemanjai 10 km nya deka nyambung Sibu ke Song lalu terus ke Kapit. — DayakDaily

Share this article!