LABUAN, Jan 4: Dalam gaya ekonomi ti enda meruan diatu, Perintah Besai agi ngemajakka polisi subsidi ninting taun RM11 juta dikena nampung ungkus perengka pengangkut ke nengah tasik Labuan-Sabah-Sarawak.
Subsidi diberi ke pejalai nengahLabuan-Menumbok-Labuan, Labuan-Kota Kinabalu-Labuan, Labuan-Sipitang-Labuan, Labuan-Limbang-Labuan enggau Labuan-Lawas-Labuan.
Nitihka pemadah ari Perbadanan Labuan (PL) subsidi ke diberi kenyau ari taun 2014 nya betuju ngelempungka tating belanja rayat ti nguna perengka pengangkut tasik bejalaika pengawa di pulau nya.
Dalam taun 2016, perintah udah ngetu meri subsidi nganjung barang nguna feri ke Labuan, udah bekau sida nemu pedagang enda nurunka rega barang di pulau nya.
Kaban Parlimen Labuan Datuk Rozman Isli ke mega Chairman PL pechaya subsidi pejalai nepan feri enggau bot laju nyaup ngelempungka tating belanja peranak Sabah enggau Sarawak ke tebal agi ari raban ke bepenatai pemisi mit. — DayakDaily
