MIRI, Jan 11: Seraban 11 iku Polis Marin Pelilih Lima udah mujur ngetanka siku lelaki kemari ti dipelabaka bisi naruh bemacham bansa barang ke nadai chukai kastam.
Komandan Tim Polis Marin Pelilih 5 Sarawak, Asisten Komisioner Salehuddin Mat Zaman madah, pengawa nya udah dipejalaika seraban Polis Marin ti betuaika Asisten Superintendan Dunsmore Intih urung pukul 10 pagi, berindik ari pansik ti dipejalaika.
“Sida udah ngabas ngenyit sereta meresa sebuah premis ba Jalai Beluru-Long Teru di Baram, urung 50 meter ari Sungai Tinjar sebedau tetemuka bemacham bansa enggau chap insap, arak enggau merechun.
“Entara ke dirampas nyengkaum 181 karton insap bemacham chap ti dianggar berega RM26,760 nyengkaum chukai enggau 94 butul sereta 144 tin arak ke dianggar berega RM5,000 nyengkaum chukai.
Ku Sallehuddin, utai bukai ke bela dirampas iya nya 66 kutak bemacham bansa enggau saiz merechun ke berega RM2,980.
“Semua penyampau ke dirampas dianggar urung RM34,740,” ku iya.
Ku iya, lelaki beumur 38 taun ari Jalai Pujut nya udah ditan sereta ditasat ari baruh Akta Kastam 1967.
Kes diserah ngagai Opis Kastam Bagi Menua Miri, ku iya. — DayakDaily
