KUCHING, Jan 11: Ex-Speaker Kunsil Negeri Sarawak sereta ex-Menteri Kabinet Negeri, Tan Sri Celestine Ujang Jilan udah midang urung pukul 7.48 malam tadi pengudah lama napi bemacham penyakit nyengkaum kemi manis.
Niang ke beumur 71 taun udah ngapuska seput ba Sepital KPJ, Stutong, pia ku Sapit Kepala Menteri, Datuk Amar Douglas Uggah Embas.
Iya kala nyadi Ketuai Pampang Nemniak PBB sereta Ketuai Nembiak komponen Barisan Nasional (BN) ke pemadu lama kala gawa sebedau dichiri nyadi Mandal Presiden Kanan PBB, ba taun 1998.
Iya mayuh peneleba gawa ba opis perintah kenyau ari taun 1966 sebedau menang ba pengawa bepilih negeri di sitak Kemena dalam taun 1974, sereta nguasa kerusi nya pengelama enam penggal, sebedau ngetu ba taun 2001.
Iya disilih anak menyadi iya empu, Datuk Seri Stephen Rundi Utom ke diatu nyadi Sekretari Besai PBB.
Dalam Kabinet Sarawak, iya kala megai dua portfolio iya nya Pemansang Tanah enggau Pengawa Berumah.
Ujang ninggalka balu, Puan Sri Elizabeth Pawa enggau tiga iku anak, Malvina, Angelina enggau Priscilla. Menantu iya Kaban Parlimen Kapit ti mega Sapit Menteri Pemansang Menua Pesisir enggau Kandang Menua, Datuk Alexander Nanta Linggi.
Pengudah ngetu ari politik, iya kala dichiri nyadi Sapit Chairman Bintulu Development Authority (BDA) sereta nyadi kaban Kaunsil Universiti Curtin Sarawak.
Iya mega nyadi pengarah kompeni baka Harbour Link Group kelimpah mangku pengawa nyadi Sapit Presiden Balai Dagang enggau Industri Dayak sereta kaban Kaunsil Amanah Yayasan Budaya Dayak. — DayakDaily
