Polis dipinta suah agi matau Genturung Pendiau Tabuan Tranquility di Kuching

Norizan (dua kanan) bejaku rambau ngelanchar KRT Tabuan Tranquality di Kuching kemari. Bela dipeda(ari kiba) Fauzi, Rasit enggau Aziz.

Chris Bishop

KUCHING, Mac 17: Polis dipinta majakka pengawa matau Genturung Pendiau Tabuan Tranquility Fasa 4 (TT4) di Kuching ditu.

Chairman ‘Kawasan Rukun Tetangga'(KRT) TT4, Norizan Jili madah ulah orang jai beserungkaika rumah dalam kandang ngelingi suah nyadi.

“Kes orang beserungkaika rumah di Tabuan Tranquility Fasa 4 suah nyadi suba alai diatu pan agi bisi, lumur dua pemadu mayuh di Mengeri Kuching.

“Lalu pia mega pengawa bejualka dadah ditu suah dipeda kami. Bungkus utai ke dipelaba dadah ditinggal ba tiang lampu lalu udah nya diambi orang bukai ke dipelaba pemeli,” ku iya.

Norliza mansutka jaku ba program ngelanchar KRT TT4 enggau Skim Rondaan Sukarela(SRS) TT4 nyerumba Program Jom Ronda begulai enggau komuniti TT4 malam tu tadi.

Program ke diatur di Lot 733, Lorong 24F TT4 dipenyadi pengari Direktor Opis Penyerakup Menua enggau Integrasyen Abdul Rasit.

Ngenang kaul ke sama, pengari Sapit Menteri Dagang Dalam Menua enggau Pekara Bebeli Barang Abdul Aziz Isa ke bela ngulu program ngelalau komuniti ke diau di TT4 bela ngelala pangan diri.

Ku iya, komuniti ke diau ngelingi meseti berakup lalu nyaup polis nyeliah kes beserungkai rumah enggau penyalah bukai.

Bela datai Ketuai Unit Pematau Bagi Penyeliah Penyalah Jai enggau Pengelikun Komuniti Opis Polis, ASP Mohd Fauzi. — DayakDaily