PKR pechaya ulih menang mayuh agi kerusi ba PRN ke deka datai

Baru Bian

KUCHING. Mei 20: Parti Keadilan Rakyat (PKR) pechaya ulih menang mayuh agi kerusi maya pengawa bepilih kunsil negeri ke deka datai bepelasarka prestasi ke enda disangka maya pengawa bepilih Mei 9 tu tadi.

Maya PRU14, PKR udah menang ba tiga kerusi baka Selangau, Miri enggau Puncak Borneo, dibanding enggau siti kerusi maya PRU13.

Ba PRN 2016, PKR semina menang di Ba Kelalan enggau Batu Lintang.

“Mayuh tekenyit nyengkaum BN enda pechaya enggau ubah nya, ” ku chairman Parti Keadilan Rakyat (PKR) Sarawak Baru Bian ba aum media di opis PKR ditu kemari.

“Enti pemujur nya mandangka sukung rayat, aku pechaya nya mandangka utai ti deka nyadi maya PRN ila,” ku iya.


Taja pia, nya tepulai ngagai rayat seraya meransang rayat meri sukung ngagai parti nya.

Baru mujur ngalahka chalun Barisan Nasional (BN), Rita Insol di Selangau ba PRU14 lalu sebagi ari nya ketegal undi protes ari penyukung penyandang Datuk Joseph Entulu Belaun ke ditingkil Presiden Parti Rakyat Sarawak (PRS) Tan Sri Dr James Jemut Masing beberapa hari sebedau ngantung nama chalun.

Pakatan Harapan diatu ngembuan 12 kerusi Parlimen di Sarawak dijangka enda meri jalai mudah ngagai BN maya PRN ila.

Taja pia, BN dijangka nyadi entiti bukai laban imej parti nya udah kamah kelimpah enggai agi , dikaitka enggau BN di Semenanjung.

Ba PRU14 BN semina menang 79 ari 222 kerusi Parlimen ti ngujungka sida tumbang lalu Pakatan Harapan mujur numbuhka perintah.

Ku Baru, PKR sedia napi PRN ke dijangka diatur ba taun 2021. — DayakDaily