KUCHING, Jun 15: Perintah udah setuju enggau perambu pra sekula sereta tadika dibuka kena 1 Julai 2020.
Menteri Kanan Pengelikun Datuk Seri Ismail Sabri Yaakob madah, prosedur operasyen standard (SOP) bekaul enggau pemutus nya udah dibantai Opis Menteri Pelajar ba aum khas Majlis Keselamatan Negara (MKN) sehari tu.
“Kitai (MKN) udah nerima sereta setujuka SOP ke dibantai enggau perambu alai pra sekula sereta tadika dibuka kena 1 Julai 2020.
“SOP nya mungkur atur ke meseti dititih maya nerima penatai pelajar, maya sida belajar dalam kelas, maya pulai, maya makai enggau prosedur maya bemain dalam tadika,” ku Ismail Sabri.
Iya mansutka jaku nya ba aum pengarang berita ninting hari Perintah Tagang Pemindah ba Timpuh Ngenyuman (PKPP) di Putrajaya sehari tu.
Ismail Sabri nambah, perkara ke silik sentang SOP nya deka dibantai Menteri Pelajar ba awak ke semak.
Perambu muka palan ngintu sereta matih nembiak nya mungkur pra sekula ke dikuasa Opis Menteri Pelajar, swasta, tadika perpaduan sereta Kemas ke dibaruh kuasa Opis Menteri Pemansang Menua Pesisir.
“Penyampau palan ke dibuka iya nya pra sekula 6,216 iti, swasta 7,887, Kemas bisi 8,530 enggau tadika perpaduan ba penyampau 1,781 iti,’ku Ismail Sabri. — DayakDaily
