KUCHING, Dis 31: Sarawak 4 Sarawakians (S4S) minta bala pengundi enggau chalun ke bisi potensi di Sarawak ngaga pemutus ukai bepelasarka personaliti, tang polisi, pengawa dikemeran enggau kerejasama ke ulih ngemajuka Sarawak enggau Malaysia nyadi menua ke kering agi, manah sereta enda bechiping.
“Enti kitai dekaka Malaysia nyadi kering agi, kitai meseti ngundi chalun ti ngakun hak rayat, nadai ngamba sengapa, ngembuan niat ke enda ditemu kitai sereta berat kereja ke rayat ,” ku Peter John Jaban ba sebengkah penerang.
Ku iya, hak ungkup Sarawak enggau Sabah ukai utai ke patut dikerandau tang pemerat ba sida patut diberi pengelebih.
“Autonomi ke manah agi ungkup Sarawak enggau Sabah nyaup kitai mujur nuntut hak kitai,” ku iya seraya madahka pengawa bepilih besai ti deka diatur tu ila nyadika pengemun ke beguna amat ngagai Sarawak.
“Pilih enggau kerejasama patut digaga. Aram meh kitai nentuka orang ke dipilih nya betul ngambika Malaysia kering agi ke semua negeri nyengkaum Sarawak,” ku iya. — DayakDaily
