PI1M ngangkatka pengelandik nguna internet ba peranak di pelilih Song

Keyboard. — Dayakdaily.com file pic. // Photo: Pixabay

SONG, April 21: Palan Internet 1Malaysia (PI1M) ukai semina palan ti nyendiaka perengkaguna Internet ngagai mensia mayuh kelebih agi ngagai orang ke kurang pemisi nguna laman sosial aja.

Program ti dipejalaika Suruhanjaya Komunikasi enggau Multimedia Malaysia (SKMM) sechara kolektif di serata menua udah ngerembaika tanggungpengawa iya nyadi sebuah palan ti nyendiaka latih dikena ngangkatka sosioekonomi rayat di menua tu.

Tanggungpengawa nya besai sereta beguna amat kelebih agi enti ba pasar mit di menua pesisir Sarawak baka pelilih Song dalam Parlimen Kapit.

PI1M Song ba kuta lama ke ditinggal maya jeman Raja Brooke nunga Sungai Rajang sereta ba tebing nanga Sungai Katibas keterubah suba dikelala enggau nama Pusat Jalur Lebar Komuniti Song ke berengkah beoperasi kenyau ari Okt 14, 2009.

Berengkah ari nya, palan nya ngembuan 2,185 raban ke berejista ti tau nguna perengka Internet ba endur nya enggau bayar RM1 sejam dibandingka enggau RM2 sejam ngagai orang ke ukai kaban.


Menijar PI1M Song, Daisy Unggang madahka palan nya mega bisi ngatur bemacham program dikena nempa mensia mayuh ngelingi ngambika nemu teknologi pemadah setipak enggau juluk menua nempa rayat ke nemu pasal pemadah nyerumba taun 2020.

“Program ke diatur kami ungkup mensia mayuh di Song baka Intel Learn Program (ILP), Program Klik Dengan Bijak (KDB), Latihan Orang Dagang, ICT Cambridge, Intel Learn Easy Steps (ILES) enggau ke pemadu baru Dashboard Komuniti,” ku iya.

Ku iya, nengah nya mensia mayuh di pelilih nya udah berengkah nelebaka diri ngaga pekara ke nadai kala dikereja sida sebedau tu baka laman sosial Facebook enggau e-dagang.

“Sebedau tu ketuai bansa enggau raban bansa nangi enggau ICT, taja pia pengudah beberapa program ngiri penemu sida diatu udah landik nguna nya,” ku iya.

Ku iya, sida diatu tau bulih pemadah sereta nemu pemansang menua luar nye gkaum polisi tj dipejalaika perintah ke ulih mantu ngangkatka pengidup sida.

Ku Daisy, Program Klik Dengan Bijak di PI1M Song ulih dikena ngelatih peranak di pelilih nya nguna teknologi pemadah enggau manah sereta betul, kelimpah mida entara pemadah ke betul enggau palesu.

Raban orang dagang mega dilatih nguna internet ngambika sida ulih ngelakuka produk sida.

Dagang mit ke mayuh dipejalaika di Song iya nya ngaga kraf marik.

PI1M Song ukai semina nyadj palan endur ngulihka penemu aja ngagai raban biak, tang mega nguna nya mantaika industri kreatif ngagai suda, ku Daisy.

“kami bisi ngiri penemu ngagai raban biak nengah chara ngaga video pandak. Aktiviti tu ulih matak pengerindusereta nerima sambut ke manah ari sida,” ku iya. — DayakDaily