KUCHING, Sept 29: Pakatan Harapan (PH) Sarawak ba platfom ke pemadu manah numbuhka perintah baru di Sarawak tembu Pengawa Bepilih Negeri Ke 12.
Pengarap tu disetuju Chairman PH Sarawak Chong Chieng Jen enggau Sapit Presiden Parti Amanah Negara (Amanah) Datuk Salahuddin Ayub.
Kededua seduai datai ngulu pengerami ngelanchar ‘Jentera’ Pengawa Bepilih Amanah ke diatur di siti hotel ditu, lemai tadi.
Pengudah pemujur ba Pengawa Bepilih Besai Ke-14 (PRU14) alai PH menang lalu numbuhka Perintah Besai di Putrajaya, Salahuddin pechaya Gabungan Parti Sarawak (GPS) ti megai perintah diatu ulih dialah.
Ku iya bejaku ngagai kaban parti, PH Sarawak diatu majak tegap pengudah pemujur ba PRU14.
“Sebedau PRU14, enda mayuh datai begulai enggau parti. Raban orang ti bejalaika pengawa parti pan enda chukup.
“Diatu kitai ba jeman pengudah PRU14 alai kitai (PH) menang lalu numbuhka Perintah Besai.
“PH diatu tegap di Sarawak lalu seharitu mayuh orang datai ngerami pemujur nengah nama PH,”ku iya.
Salahuddin enggau nyemetak madah tuju ngelanchar ‘jentera’ tumu ketegal ti keran teulihka pemujur ba PRN12 ti disadang diatur ba taun 2021.
Nambahka nya, iya netapka chalun ngarika Amanah di 13 Sitak Kunsil Negeri (DUN) udah dikelala diatu.
Ngenang kaul ke sama, Chong ke mega MP Stampin enggau ADUN Kota Sentosa setuju diak PH meseti nyikap diri ari diatu.
Beambika chunto maya PRU14, iya madah agih penuduk ungkup tiga parti, iya nya DAP, PKR enggau Amanah udah diputuska tumu.
“Ba PRU14, kitai nyadi negeri ke pemadu tumu mutuska pekara nya alai kitai nyadang menang di 5 tauka 6 penuduk parlimen.
“Tang pemutus mandangka PH Sarawak menang dua tauka tiga kali lipat arika disadang.
“Pemujur tu asil pengawa kitai ti udah mutuska agih penuduk tumu lalu patut dichunto maya napi PRN12,” ku Chong.
Iya netapka agih penuduk ungkup PRN12 deka nitihka chara ke udah dikena maya PRN 11 ke diatur ba taun 2016.
DAP ku Chong deka nganjung chakun bediri di 29 sitak DUN, Amanah (13) enggau PKR ba 40 sitak DUN.
Ba sentang pekara bukai, iya madah PH Sarawak deka nguna simbol PH maya PRN12.
Bebida enggau PRU14, Chong madah DAP nguna simbol Rocket lalu PKR nguna enggi sida empu. — DayakDaily
