KUALA LUMPUR, Mac 3: Petroliam Nasional Bhd (Petronas) komited mayar dividen RM19 bilion ngagai perintah ba taun 2018, dibanding RM16 bilion ba taun 2017.
Presiden enggau Ketua Pemesai Eksekutif, Tan Sri Wan Zulkiflee Wan Ariffin madahka Petronas ngagihka RM55 bilion ungkup belanja puku dibanding RM44.5 bilion ba timpuh ke sama.
“Petronas deka majak ngangkatka pemansut ke mayuh agi nengah penyulut operasi udah ngeletak kompeni ba penuduk ke tegap dikena bejalaika strategi timpuh panjai,” ku iya maya ba penerang media bekaul prestasi wang 2017 Petronas ditu, empai lama udah.
Ku iya, Petronas deka nguna memanah aset sereta ngerembaika dagang minyak enggau gis nengah model dagang ‘bersepadu’ kelimpah nambahka pelasar pemansut dikena nentuka kuing kompeni jemah ila.
“Nengah strategi nya Petronas ulih ngerembai di rantau strategik baka ASEAN, subbenua India, Asia Barat enggau Amerika,” ku iya.
Untung beresi Petronas baa taun pekara wang ke ditutup kena 31 Dis, 2017 nambah 91.2 peratus ngagai RM45.4 bilion ari RM23.8 bilion ba taun 2016.
Penguntung nya mega nambah 14.6 peratus ngagai RM223.6 bilion ari RM195.1 bilion ti dirikod ba taun 2016. — DayakDaily
