MUKAH, Jan 8: Pesta Kaul sebengkah pengerami ti ngelaika gaya pengidup raban bansa Melanau di Sarawak.
Ku Menteri Pengelantang Pendiau, Komuniti, Orang Indu, Ruang Bilik enggau Pemansang Nembiak Mit Dato Sri Fatimah Abdullah madah, taja pan bisi mimit bebida ba entara raban bansa Melanau, tang pengerami nya nyadi sebengkah penyemaka ke nyelai.
Iya madah, raban bansa Melanau ngetanka Pesta Kaul nyadi kelai penyerakup ba sida.
“Sebut aja Pesta Kaul semua orang nemu nya pengerami ungkup orang Melanau di Sarawak,” ku iya.
Fatimah ngakun, taja pan bisi ubah ari sukut jalai pengarap, tang tuju nya tetap sebaka iya nya ngempuru sereta nyerakupka semua.
Nengah awak nya mega Fatimah besemaya deka ngangkatmanah perengkaguna ke dikena ngerami pengerami nya nyengkaum pemansang ba kandang genturung pendiau.
Iya mega meransang peranak menua nya berakup sereta meri kerejasama ngagai ketuai rqban bansa ke udah dipadu.
Ku iya, tu beguna amat ke pemansang menua sida lalu ketuai tu mih ke nyadi pengaul entara raban bansa, ketuai enggau perintah. — DayakDaily
