Komen
Pengawa deka ngatur Aum Pengari Tiga Taun Sekali (TDC) dalam timpuh urung 20 hari ke deka datai, tebal agi mayuh penuduk puang dalam kaunsil besai Parti Pesaka Bumiputera Bersatu (PBB) dikejaku sereta dikerandau ba kedai kopi nyengkaum sekeda komen ari surat berita enggau sainstis politik.
Ba pengiruh tetiap iku ke deka nemu sapa orang baru ke patut nyadi kaban kaunsil besai nyukung pemerintah ke baru, siti komen ke dipansutka empai lama dipeda baka ke enda dikeingatka agi semua kaban pampang PBB Pesaka.
Komen nya sentang sapa orang ke deka diangkat nyilih Datuk Patinggi Abang Johari Tun Openg nyadi Kepala Menteri pengudah iya badu ila, ukai sapit kanan iya ke pemadu lama udah mangku pengawa, tang sapit iya ti kurang agi pengelama dalam PBB, engka udah ngeringatka komuniti Dayak beberapa taun ke udah.
Penerang ti ngemaruh ke dipansut beberapa hari ke udah, semina bisi nerima bantah mimit aja. Penerang ke enda temu pengamat nya nadai nerima timbal dalam timpuh empat hari bejurut, ke patut di saut dalam timpuh nya.
Semua rayat Malaysia nemu Sarawak kala bisi dua iku Kepala Menteri Dayak, Tan Sri Datuk Amar Kalong Ningkan dalam taun 1963 enggau Dato Sri Penghulu Tawi Sli dalam taun 1966. Maya numbuhka PBB, Presiden parti iya nya niang Temenggong Jugah Barieng, Dayak ari pampang Pesaka. Tang pengamat iya, ‘Dayak’ enda tau nyadi Kepala Menteri Sarawak laban sebedau tu nadai kala bisi ditulis munyi nya.
Ba penerang ti dikeluar siku associate professor ke mega saintis politik ari sebuah universiti nengeri tu beberapa hari ke udah ti berani mansutka penemu iya, bepelasarka pelaba, semina Sapit Presiden ari pampang Bumiputera tau nyadi Presiden PBB udah tu ila.
‘Pelaba pengelebih’ ngagai Sapit Presiden pampang Bumiputera ngelui Sapit Presiden Dayak, enti enda dibantah, tau nyadi salah ari sukut dikemendarka bansa Dayak ti dikuasa penuh nengah politik Bumiputera.
Ulah ti enda mujur Pesaka enggau kaban iya ngenanka integriti ketuai sida pengudah empat hari, nyadi ke kelai. Nyadi orang ke pemadu kanan Sapit Kanan semina nyadi orang lumur dua Kepala Menteri aja, Datuk Amar Douglas Uggah nadai engkeretik lalu semina ulih mandangka iya enda ibuhka pekara nya, sereta nadai pengirau ke alai pangku pengawa Kepala Menteri deka beri ngagai orang ke biak agi ari sukut penuai dalam parti.
Suba enti penemu ke baka tu dipansut, deka dibantah. Pengering ngelaban ti berambaika leka jaku ‘agi hidup, agi ngelaban’ enda ngemendarka ketuai Dayak dikemaruhka saintis politik.Penyukung Pesaka patut ngasaika pekara tu ngemaruhka ketuai sida. Sida patut ngaga terabai dikena nyaga penuduk bansa Dayak ngambika sebaka peninggi dalam parti.
Lebuh macha tu, enda ulih diseliahka sekeda bansa Dayak deka nyalahka pemambar parti politik di Sarawak, udah ngelemika pengering Dayak baka ke nyadi kemaya hari tu.
Taja pia, ba raban Dayak ke enggai berunding mayuh lebuh ke ditanya tanya mudah: Nama kebuah ketuai Pesaka enda engkeretik ba pekara nya lebuh komen ti ngemaruh nya dituju terus ngagai iya ? Baka telih ke ditabur garam, penerang nya diengkah ba lambar mua surat berita, ngambika dipeda semua.
Udah empat hari kenyau ari amba penerang sainstis politik nya udah dikeluarka ba surat berita. Taja pia, enda nemu kebuah, penerang ti ngemaruh nya nadai ditimbal.
Naka rikod ke ditemu, nadai udah bisi pemadah tau resolusi baru dikemendarka PBB ti enda ngematutka Dayak nyadi Presiden parti udah tu ila. Semadi mih Uggah enggau sainstis politik aja nemu utai ti enda ditemu kitai ? — DayakDaily
