SIBU, Jun 15: Perintah Sarawak dipinta beratika perambu deka mindahka baru Kampung Jeriah di KM6 Jalai Oya ditu ke suah ampuh bah ngaga endur ke manah agi.
Kaban Parlimen Bandar Sibu Oscar Ling Chai Yew madah, diatu skim pengentap baru nya ke ba tanah kerapa suah tekerap, lalu ungkup timpuh panjai ‘ungkus ke besai amat’ deka dikena nyendia sereta ngetanka pelasar infrastruktur ngagai peranak dia.
“Nama kebuah alai tu dipilih endur ngaga palan pengentap baru? Bisi enda sebarang perambu mindahka baru genturung pendiau nya?,” tanya iya rambau aum media di indu opis DAP Sibu di Taman Rajang ditu kemari.
Ling madahka projek nagang ampuh bah ke beungkus RM18 juta dikena ninggika jalai alun, ngangkatmanah parit enggau entali ai sereta ngaga jalai semin ngagai 35 buah rumah di Kampung Jeriah nengah dua renggat begunaka ungkus ti kelalu tinggi.
“UkaI aja ungkus nya kelalu tinggi, jalai alun mega deka nyadi tinggi agi ari rumah ke suah tekerap. Perintah mega patt merj mayuh agi agih belanja ungkup timpuh ke panjai dikena ngetanka infrastruktur,” ku iya. — DayakDaily
