Serap pupu bansa ngabang sereta ngerami Aidilfitri begulai enggau KM sehari tu

Datuk Patinggi Abang Johari Tun Openg

KUCHING, Jun 15: ‘Rumah Tebuka’ Aidilfitri Kepala Menteri Sarawak udah digulu serap mensia mayuh enda ngira bansa enggau jalai pengarap.

Berengkah ari pukul 9.00 pagi tadj mensia mayuh udah nedatka Palan Konvensyen Borneo Kuching (BCCK) betemu seraya meri selamat Aidilfitri ngagai Datuk Patinggi Abang Johari Tun Openg enggau bini iya Datin Patinggi Datuk Juma’ani Tun Tuanku Bujang.

Ba sekeda bala ke datai, tu meh awak sida meda sereta betabi enggau kepala menteri seraya ngenataka Selamat Hari Raya ngagai iya.

Bisi mega sekeda madah, semina suah meda iya bejaku dalam radio enggau televisyen, tang nadai kala betemu enggau ketuai lumur satu negeri nya.

Awak ngabang ngagai Rumah Tebuka Kepala Menteri tu mega meri peluang ngempuru mensia mayuh begulai sereta bekelala lalu ngeratka kaul enggau pangan diri jelimpah makai pemakai ke diidang rambau nya.

Rumah Terbuka Kepala Menteri diatur pengelama dua hari berengkah sehari tu ari jam 10 pagi ngagai 5 lemai. — DayakDaily