Dikarang Chris Bishop
KUCHING, Mei 27: Perintah nengah FAMA deka nentuka tetiap iku orang dagang mit bisi palan ke engkeman endur nyual produk.
Menteri Betanam Betupi enggau Industri Asas Tani Dato Salahuddin Ayub madah pekara nya berat ngambi ulih nentu orang dagang mit majak mansang ke mua.
“Kitai nyendia peluang ngambika semua orang dagang di Sarawak ulih bedagang tauka ngelaku produk agro pemakai sida.
“Berindik enggau nya, aku deka nyukung sereta mantu FAMA alai aku mega minta ijinsi tu jemah ila ulih nentuka tetiap iku orang dagang mit bisi palan ke engkeman endur nyual produk,” ku iya.
Salahuddin mansutka penerang nya ngagai pemberita pengudah nemuai kereja ba Medan Niaga Satok.
Ba penemuai nya, Salahuddin bisi mega ngelawa Bazaar Ramadhan di Medan Niaga Satok kelimpah ngagihka ‘bubur pedas’ ngagai mensia mayuh.
Ngenang kaul ke sama, iya pechaya Medan Niaga Satok bisi potensyel dikemansang manah agi jemah ila.
“Ditu meh aku dekaka FAMA seruran ngembing lalu ngangkatka bansal bedagang ditu nyadi palan endur orang dagang mansang ke mua.
“Agro bazaar di Medan Niaga ditu majak dikerindu rayat sereta udah tebilang,” ku Salahuddin.
Medan Niaga Satok ke dibuka ba taun 2013 digaga nengah belanja RM46,576,910 ba tanah pemesai 12.25 ekar di Jalai Matang ditu.
Palan dagang tu nyendia 1,100 iti bangsal dagang ke mungkur Blok Kekal, Pasar Minggu, Pasar Borong enggau Medan Selera Benteng Satok. — DayakDaily
