Perintah PH deka fokus ngagai peneka rayat – Gobind

Gobind Singh Deo

PUTRAJAYA, Jun 16: Malaysia baru ari baruh pegai Pakatan Harapan deka fokus ngagai pengingin rayat nengah mayuh bengkah program ti deka dipejalaika ba awak ke semak.

Menteri Komunikasi enggau Multimedia Gobind Singh Deo madah, ketegal nya semua rayat Malaysia meseti beserakup ngambikaterus maju ke mua ke pemaik menua oengudah nengah proses Pengawa Bepilih Besai ke-14 (PRU14) tu tadi.

“Kitai ulih meda sehari tu (kemari), chukup nyata rayat Malaysia beserakup,” ku iya lebuh dikerandau ba Pengerami ‘Rumah Terbuka Aidilfitri’ Menteri Besai enggau Raban Menteri di Seri Perdana, ditu kemari.

Iya nyempulang Menteri Besai Tun Dr Mahathir Mohamad sereta raban kabinet ke vukai betabi enggau bala ke datai seraya meri terima kasih ngagai sukung ti dipandang rayat pupu bansa ngagai perintah.

Ku iya, pengerami nya ungkup semua lalu iya meri terima kasih ngagai sida ke datai ngemujurka program nya.

Berebak enggau nya, Menteri Pengawa Berumah enggau Kunsil Kandang Menua, Zuraida Kamaruddin madahka penatai mensia mayuh ke nyau bededat nya mandangka sukung penuh rayat ngagai perintah.

“Talukka Malaysia baru begunaka patriotisme entara sesama rayat.Penatai rayat ke chukup mayuh tu sigi enda disadang,” ku iya.

Naka jam 3.40 lemai, bisi 50,000 iku udah datai ngabang ba hari keterubah pengudah Pakatan Harapan menang ba PRU14, ke diatur ari pukul 10 pagi nyentuk pukul 4.30 lemai kemari. — DayakDaily