Perintah negeri udah ngeluar RM7 juta dikena ngemujur projek ngintu estet rian

Frozen Musang King durian. — DayakDaily.com file pic. // Photo: Pixabay

LIMBANG, Mei 24: Perintah negeri udah melanja RM7 juta dikena nentuka projek besai ngintu rian ulih dikemujur sereta ngemansutka asil.

Nya ngambika ulih ngasilka buah ti mayuh, bekualiti sereta manah dikena nangkup pinta ari menua tu empu enggau ke eksport.

Menteri Muda Betanam Betupi, Dr Abdul Rahman Ismail madahka projek nya kerejasama entara Opis Betanam Betupi enggau Top Fruits (Sarawak) Sdn Bhd, ke ngembuan peneleba dalam industri rian.

Iya mega madahka perintah negeri udah nyain sempekat pemereti ati (MoU) enggau Top Fruits Company (Sarawak) Sdn Bhd taun tu, dikena mantu pekebun rian ngasilka buah ti bekualiti tinggi sereta ngatur industri.

Dr Abdul Rahman mega madah, empat kandang menua udah dikelala ungkup projek nya baka Serian, Betong, Long Lama enggau Limbang.


“Ngintu madang rian ke sigi udah bisi nya siti ari chara ke pemadu manah, jampat sereta ke pemadu ngasi dikena perjntah ngasilka buah rian ti nitihka pinta ari dalam menua tu enggau makit menua tasik.

“Ngambika ulih nyapai tagit nya, here di Pelilih Limbang ditu aja kami udah ngelala bisi 5,000 ari 45,000 pun rian ke tau diintu,” ku iya madah ba Program Ngintu Estet Rian ba Kampung Bangkuati kemari. — DayakDaily