Dikarang Chris Bishop
KUCHING, April 7: Kupi nyadi sebengkah agi utai tanam ke tau nyaup ngangkatka Sarawak nyadi negeri pemansut pemakai pemadu besai jemah ila.
Bejaku ba Simposium Kopi Borneo di Kuching seharitu, Sapit Kepala Menteri Datuk Amar Douglas Uggah madah perintah meri sukung ngagai pengawa numbuhka kebun kupi.
“Kitai suah ngelalau orang bekebun ngambika enda bepanggai ba siti utai tanam aja.
“Sida diperansang nanam sawit, lada, nenas, nupi ikan enggau jelu alai diatu kitai meretika potensyel kupi,” ku iya.
Ba program nya, Uggah ke mega Menteri Betanam Betupi Moden, Tanah Adat enggau Pemansang Kandang Menua(Manred) bisi ngemata pengawa nyain Sempekat Pemereti(MoU) entara Perintah Negeri enggau kompeni ‘anchor’ ba dagang kupi.
MoU nya disain Perintah Negeri Sarawak nengah Opis Betanam Betupi Sarawak (JPS) enggau Earthlings Coffee Workshop Sdn. Bhd.
JPS diarika Pemangku Direktor Dr Alvin Chai alai Earthlings Coffee diarika Direktor Pengatur Pengawa Dr Kenny Lee.
Ngenang sentang MoU nya, Uggah madah atur ngena modul kompeni ‘anchor’ ulih mutarka semua pemar ba pengawa betanam betupi kelebih agi ulih nyaup orang bekebun.
Baka ke suah ku iya, orang bekebun napi pemar ba pengawa ngelaku asil tanam sida.
“Nengah modul kompeni ‘anchor’, asil tanam sida deka dibeli kompeni tu lalu nadai agi napi pemar ngiga pemeli,”ku Uggah.
Dulu agi ari tu ku iya nambah, perintah mega udah nyain MoU enggau kompeni ‘anchor’ bukai iya nya ba dagang buah rian, nenas, pisang enggau buah nyiur.
Iya madah Sarawak diatu mengkang bisi tanah pemesai 2 juta hektar ke tau dikemansang ba pengawa betanam betupi.
Diatu ba Kandang Pemansang Tanah Tinggi (HDA) udah bisi 200 hektar kebun kupi alai tu siti chara ke manah endur ngerembaika kebun kupi di Sarawak, tandu Uggah.
Sarawak ba taun 2017 ku iya udah ngeluarka belanja RM134 juta dikena meli 9,482 tan igi sereta produk kupi tang semina nyual 17 tan nengah rega RM359,000.
Iya ngarap penyampau nya ulih dikalih jemah ila alai Sarawak deka nyadi negeri pemansut kupi.
Kepala menteri udah netapka juluk diak Sarawak deka nyadi negeri pemansut pemakai pemadu besai manggai ba taun 2030.
Bela datai Menteri Muda Betanam Betupi Dr Abdul Rahman Ismail enggau Sekretari Manred Datu Ik Pahon Joyik. — DayakDaily
