KUCHING, Nov 8: Pengudah Perintah Besai Pakatan Harapan (PH) enda ngagihka belanja ungkup kereja nyukat kelingi tanah NCR, Perintah Negeri dipinta nangkup tanggung pengawa nya.
Kaban Kunsil Negeri (ADUN) Pelagus Wilson Nyabong madah pekara nya berat ngambika kereja nyukat kelingi ulih ditampung belama.
“Ba taun ke udah, Perintah Besai bisi ngagihka belanja dalam bajet ninting taun dikena ngemujur kereja nyukat kelingi.
“Tang perintah baru (PH) tu enda ngagihka belanja ba bajet menua 2019,” ku iya rambau debate nyukung Bajet Negeri 2019 ba Aum Dewan Undangan Negeri (DUN) ke 18 ditu kemari.
Berindik enggau nya, Wilson minta Perintah Negeri nyendia agih belanja ungkup kereja nyukat kelingi.
Ku iya, kereja nyukat nya meseti seraris enggau ubah kod tanah ti udah dikemendar DUN ba aum bulan Julai tu tadi.
“Agih belanja besai ditagih ngambika kereja nyukat pemakai menua ulih diadu ba kandang endur ke udah tembu kereja nyukat kelingi tanah NCR.
“Aku mega minta Opis Tanah enggau Penyukat ngeluarka surat pala tanah enggau lengkas ba kandang endur ke udah disukat kenyau ari taun 1980,” ku iya.
Ngenang kaul Sarawak nempa chukai jual baru ke diterit ba produk petroleum ba ikas 5 peratus, Wilson pechaya atur nya enda ngeruga makit, tang semina ngurangka untung Petronas.
Kenyau ari 1974 ku iya, Petronas udah bulih penguntung asil dividen ari chukai petroleum.
“Akta Pemansang Petroleum 1974 udah diterit pengelama 44 taun. Berindik enggau nya sigi ngena enggau maya Sarawak nguna kuasa.
“Nambahka nya, Petronas udah mulaika puku ti diperanak di Sarawak. Diatu Sarawak meseti meratka pemaik diri,”ku Wilson.
Iya nambah, chukai petroleum ke dikumpul ari Sarawak patut dipulaika ngagai Sarawak alai pengawa Perintah Besai ti enda bebasaka MA63 ngujungka Sarawak ngeletak pemutus ke terit.
“Sarawak neritka chukai jual ba produk petroleum alai chukai tu patut udah digaga lama suba,” ku iya nandu. — DayakDaily
