Perintah negeri nadai bechiping mantu sekula peribit Cina di negeri tu

Datuk Dr Sim Kui Hian

KUCHING, April 22: Menteri Kunsil Kandang Menua enggau Pengawa Berumah, Datuk Dr Sim Kui Hian madahka perintah negeri taun siti nyin tadi udah meri belanja RM 7 juta ngagai sekula peribit Cina di negeri tu.

Ku iya, perintah negeri mega meri belanja bejuta ringhit ngagai gerija enggau kuil di negeri tu, tang di Pulau Pinang enggau Selangor, bisi enda sida meri bantu ke baka nya ngagai sekula Cina.

Sim madah, isu ke ditapi komuniti Cina di Semenanjung enda sebaka enggau komuniti Cina di Sarawak.

Bejaku ba pengerami nyerahka cek geran perintah ngagai 35 gerempung ba indu opis di Parti Rakyat Sa’ati Sarawak (SUPP), Sim temegah enggau komuniti Cina di Sarawak ti gaga agi sereta puas ati enggau perintah.

Presiden SUPP nya madah, bansa Cina di Sarawak idup likun sereta lantang.


“Enti Cina din enda lantang ati, tang asal meh kitai ditu berakup sereta lantang,” ku Sim.

Sim ngelalau rayat di negeri nyengkaum bansa Cina ngambika semampai berakup ngambika mudah Sarawak negika hak ari baruh Sempekat Malaysia 1963 (MA63).

Sim madahka pengawa bepilih ke sekali tu, ukai semina ngundi ke DUN tauka Parlimen, tang undi nya ngulihka pulai hak minyak enggau gis enggau hak bukai Sarawak nitihka MA63.

“Kitai meseti kering sereta chukup kerusi parlimen ba pengawa bepilih besai ke sekali tu,” ku Sim. — DayakDaily