Perintah negeri komited ngubah Undang-Undang Tanah Negeri — Uggah

Datuk Amar Douglas Uggah Embas

KUCHING, Mei 8: Ari 1.2 juta hektar tanah Hak Adat Bumiputera (NCR) di serata Sarawak, 855,000 hektar udah disukat lalu 650,000 hektar udah digazet Opis Tanah enggau Survei (JTS).

Ku Sapit Kepala Menteri Datuk Amar Douglas Uggah Embas, ari penyampau nya, 6,000 hektar disukat ari baruh Seksyen 18.

Sentang isu Pemakai Menoa enggau Pulau Galau, perintah negeri komited ngubah Undang-Undang Tanah Negeri ke deka dipejurai ba Aum Kunsil Negeri (DUN) Julai tu ila.

Ku Uggah, pekara nya diatu udah ba renggat ke penudi.

Uggah madah, perintah nemu tanah NCR ke patut diempu nya beguna amat ba rayat Bumiputera di negeri tu.


Bejaku lebuh bejadi pengawa nutup ‘Jualan Gawai Bau (BGS) 2018’ di Dataran Bau, Uggah madahka Kepala Menteri Datuk Patinggi Abang Johari Tun Openg udah minta iya nyadi chairman komiti dikena nentuka semua tanah NCR ari baruh Gerempung Dayak Bidayuh Menua (DBNA) patut bulih surat pqla tanah.

Uggah ke mega Menteri Betanam Betupi Moden, Tanah Adat enggau Pemansang Kandang Menua madah, perintah deka majak nyukat perimeter tanah NCR nengah Seksyen 6 enggau ari baruh Seksyen 18.

Ba pengerami nya, Uggah ngungkupka belanja RM30,000 ari baruh Projek Mit Pemansang Menua Pesisir (MRP) dikena nyukung pengerami BGS nya, sereta nyuaka cek RM1 juta ari baruh Unit Hal Ehwal Jalai Pengarao Bukai (Unifor) ke guna gerija di Bau. — DayakDaily

Share this article!