Perintah negeri chakah munaska pengawa berimba kampung ke nadai pemendar — Awang Tengah

Cutting chainsaw. — DayakDaily.com file pic. // Photo: Pixabay

KUCHING, Julai 18: Perintah Negeri Sarawak komited munaska pengawa berimba kampung nadai pemendar nengah chara negapka agi operasi nagang ngena teknologi ke pemadu baru, ku Menteri Pemansang Mengeri enggau Pengeraja Asal, Datuk Amar Awang Tengah Ali Hasan.

Ku iya, entara teknologi ke dikena nyidi tumu pengawa berimba kampung nadai pemendar nya iya nya ngena chara ‘Remote Sensing’, ‘Hyperspectral’, ‘Compact Airbone Tactical’ (CAT)’ enggau ‘Drone’.

Ku iya baru, ungkup timpuh Januari ngagai Jun 2018, bisi 44 kes pengawa berimba kampung nadai pemendar udah ditasat ke alai isi padu lumpung kayu ke dirampas iya nya 6,697 meter padu enggau rega royalti RM435,287.

“Ari penyampau nya, siti kes udah mujur didawa ba kort lalu 26 kes nadai suspek sereta 17 kes mengkang ditasat. Dalam timpuh ke sama, empat iku pesalah udah diukum jil 10 bulan ketegal penyalah ngembuan asil kampung ti nadai pemendar,” ku iya.

Awang Tengah ke mega Menteri Pemansang Industri enggau Orang Dagang Sarawak, madah munyi nya lebuh bejuraika mosyen pengaga ati ba jaku Yang Dipertua Negeri Sarawak di Dewan Kunsil Negeri Sarawak ditu kemari. — DayakDaily