KUALA LUMPUR, Julai 18: Chukai Bejual enggau Servis (SST) enda nating rayat dibanding enggau Chukai Barang enggau Servis (GST) laban perintah semina ngumpul RM21 bilion setaun ke lalu ‘mulaika’ bida RM23 bilion ngagsi sida, pia ku Menteri Pekara Wang Lim Guan Eng.
Ku iya, penyampau SST ke digumpul dipelaba semina RM21 bilion setaun penuh dibandingka enggau GST perintah ke sebedau tu iya nya RM44 bilion ungkup taun 2018.
“Jaku tuduh Umno ti madahka SST deka nating rayat dibanding GST nya enda logik.
“Kenu ku sida, pengawa aku ti mantaika deka ngena semua sistem chukai lama enggau chukai bejual ba ikas 10 peratus enggau chukai servis sepenyampau enam peratus mai reti penyampau chukai nya 16 peratus, tinggi agi dibandingka enggau enam peratus GST,” ku iya madah nengah siti penerang.
Ku Lim, nya enda amat laban kitai enda tau sepeneka ati nambahka peratus chukai bejual enggau chukai servis, ‘baka nyemaka ke epal enggau limau.’
Perintah ti betuaika Pakatan Harapan deka mulaika SST – sistem chukai sebedau GST berengkah ari Sept 1 lalu nginsil GST.
Lim ke ngenang penyaru runding ti dikerembai kemari, madahka Chukai bejual ba ikas entara 5 peratus enggau 10 peratus dikena ba produk dikilang enggau sekeda produk aja ke diimport lalu ukai semua produk, dibanding GST. — DayakDaily
