Perintah deka mai mayuh agi ubah pemansang ke Sebauh


BINTULU, Mac 2: Perintah negeri benung ba renggat perambu deka mai mayuh agi pemansang ngagai Sebauh ngambika nyadi pelilih ti lebih moden sereta progresif.

Menteri Muda Jalai Tebing Pantai Datuk Julaihi Narawi madah, pelilih nya bisi potensi dikemansang laban ba endur ke strategik.

“Perintah negeri nemu Sebauh bisi jalai ngasaika pemansang laban ke semak enggau menua bukai baka Kapit, Belaga, Baram enggau Miri. Nya kebuah erintah merambu deka mai mayuh agi pemansang dikena ngubah Sebauh.

“Nengah ubah mai ngagai Sebauh nya sepipak enggau status iya ke diangkat nyadi pelilih menua kena Ogos 1, 2015,” ku iya.

Ku iya, peranak Sebauh suba balat bepanggai ba servis feri tang deka ngasaika perengkaguna ke manah agi enti projek jematan Batang Kemena tembu, lalu nya bisi bejantil enggau Pan Borneo Highway.

Iya mega madahka perintah deka ngangkatmanah jalai tebing pantai ari Lundu, ke Asajaya, Sadong Jaya, Sebangan, Sebuyau, Pusa, Kabong, Daro, Matu, Kuala Balingian enggau Jepak di Bintulu.

Ku iya baru, jalai tebing pantai nya deka meri pemaik ngagai orang bumai, bekebun enggau berikan ba kandang menua nya ngambika sida mudah agi ngangkut asil ngambika dijual. — DayakDaily