Perintah BN bebendar deka ngemansang industri pemansut, betanam betupi di Betong

Gerald Rentap Jabu

KUCHING, Mei 7: Dalam pelin pemansang di Bagi Menua Betong, Perintah Barisan Nasional beratka sektor betanam betupi enggau industri pemansut dikena ngangkatka ekonomi rayat ngelingi nya.

Ketuai Nembiak BN Sarawak Gerald Rentap Jabu madah, Betong dalam kandang agropolitan Bukit Sadok ti mungkur sitak Parlimen Lubok Antu, Betong, Saratok, Batang Lupar enggau Sarikei.

“Kandang agropilitan nya diperambu nyadi palan pemansut pemakai negeri Sarawak.

“Nguna chara betanam betupi moden baka ‘internet of things’ dikena ngasilka buah enggau sayur,” ku iya.

Nya kebuah Kepala Menteri dwka numbuhka estet industri enggau penyangkai bilun mit ngambika produk ti diasilka ditu lalu ulih dianjung terus ngagai makit di menua tasik.


Ari sukut pemansang modal mensia, kita deka beratk bidang pelajar ari prasekula nyentuk ke sekula sekondari,” ku iya.

Kitai mega beterima kasih ngagai Perintah BN laban deka nyendiaka Palan Latih Nembiak di Betong nengah kerejasama enggau Yayasan Sarawak.

“Palan tu ila deka muka kelas tuisyen ngagai nembiak sekula kelebih agi ba matapelajar sains, matematik enggau Inggeris,” ku iya.

Ku Rentap, program Perintah BN ke bukai iya nya Program Transformasi Menua Pesisir (RTP), eko dagang temuai, dagang temuai lumba enggau main,daya pengidup enggau penyerakup mensia mayuh deka dipajak ngambika tetiap program bepelasarka rayat teulihka pemujur. — DayakDaily