Kompleks betanam betupi deka digaga ba Igan

IGAN, Mei 7: Parlimen Igan bisi jalai nyadi pemansut asil betanam betupi negeri jemah ila.

Kepala Menteri Datuk Patinggi Abang Johari Tun Openg madah, patut bisi infrastruktur dikena ngatur palan endur betanam betupi enggau manah agi sereta ngemeranka teknologi ke diatu dikena nambahka asil betanam betupi.

“Perintah negeri udah ngemendarka RM5 juta dikena ngaga kompleks betanam betupi di Igan.

“Pengawa betanam betupi diatu udah betukar ngagai chara baru lalu teknologi nya ulih nambahka asil betanam betupi ti mayuh agi.

“Aku mega dekaka sektor betanam betupi ditu dikaul enggau teknologi bepelasarka ekonomi digital,” ku iya lebuh bejaku ba mua rayat di Parlimen Igan kemari.

Ku iya baru, kandang Matu mega diberi ungkup belanja RM5 juta dikena ngaga opis pelilih ke baru baka opis pelilih Daro.

Perintah mega deka ngaga projek ai begrid negeri dikena mekal ai beresi ngagai serata negeri.

Projek nya begunaka belanja RM 8 bilion dikena ngemujurka pengingin semua rayat negeri tu ti dekaka bekal ai beresi,” ku iya. — DayakDaily